Hólsá vesturbakki, ósasvæði

Ósasvæði Hólsár vesturbakka  er eitt gjöfulasta 2 stanga laxveiðisvæði  landsins þar sem árlega ganga hátt í 10.000 laxar í gegn á leið upp í Ytri- og Eystri-Rangá.

Margir sem hafa veitt á þessu svæði hafa lent í einstökum ævintýrum. Veiðileyfi eru eingöngu seld á mesta göngutíma, júlí og ágúst. Tvær stangir eru seldar saman án gistingar. Svæðið býður upp á frábæra veiðimöguleika og veiðimenn geta valið á milli fluguveiði og spúnaveiði. Áin er mjög breið en laxinn heldur sig oftast við bakkana eða skammt frá landi, sem gerir fluguveiði að jafn góðum kost og spúnaveiði.

Tvær stangir eru seldar saman frá morgni til kvölds í stökum dögum. Þetta svæði er tilvalið fyrir vinahópa og fjölskyldur sem vilja njóta veiðinnar í næði og eiga góða stund saman. Veiðisvæðið nær frá veiðistaðnum Ofn sem er staðsett rétt neðan við veiðistaðinn neðri Borg og síðan alla leið niður í Ós.  

Helstu veiðistaðir eru: Ofn, Raflína og Hólsárós. Leyfilegt er að veiða á flugu og spún frá 1. júlí til 31. ágúst. Veiðisvæðið er um 5 km langt.

ATH! Ekki verður hægt að aka meðfram veiðisvæðinu eins og áður fyrr. Verið er að skipuleggja bílastæði þar sem veiðimenn geta lagt og þaðan gengið meðfram ánni. En verður hægt að aka niður í Hólsárós, en ekki æskilegt að aka þangað á fólksbílum eða óbreyttum jeppum þar sem sandurinn er laus og auðvelt er að festa bifreið.