Grímstunguheiði

Almennar upplýsingar

Á Grímstunguheiði má finna afar fjölbreytta og skemmtilega veiðimöguleika. Samanlögð bakkalengd ársvæða á heiðinni er rúmlega 200km.  Efri hluti Vatnsdalsár er vatnsmestur og þar veiðast gjarnan stærstu fiskarnir. Veiða má Vatnsdalsá ofan fossaraðarinnar Rjúkanda, Kerafoss og Skínanda.   Í kvíslunum sem mynda Vatnsdalsá má einnig gera góða veiði og hefur Strangakvísl oft gefið vel. Einnig er fiskur í Þjófakvísl, Miðkvísl og Kolkukvísl. Refkelsvatn, Galtavatn og Þórarinsvatn gefa oft góða veiði. Fiskurinn er í vötnunum er vænn, meðalþyngd 2.5-3 pund.  Fjöldi annarra vatna er á heiðinni og fiskur í þeim flestum.

Leyfð er veiði með 10 stöngum á heiðinni og allar stangir seldar saman.  Gistipláss er fyrir allt að 12 manns (kojur) í skálanum. 

Hér er kort af svæðinu, ath! rauði slóðinn aðeins fær alvöru fjallabílum.  https://goo.gl/maps/SbDTmvYTvY5ZQk8U8

Það eru alltaf fiskar í Þjófakvísl sem rennur næst skálanum. Yfirleitt ekki margir en hægt að setja í þá ef farið er varlega að henni. Finnur þá í beygjunum beint niður af skála. Svo eru stundum fiskar í beygjum nokkur hundruð metrum ofar líka.

Yfirleitt er alltaf nokkuð af fiski í ármótum Þjófakvíslar og Ströngukvíslar.

Það er nokkur fjöldi af sprænum og lækjum þarna sem hægt er að kasta í til viðbótar. Til að mynda Bríkarkvísl, Kolkukvísl og Miðkvísl sem og Vatnsdalsánna (ofan fossa) eftir að þessar ár koma saman á ólaxgenga svæðinu uppi á heiði. Ágætt að skoða staðhætti á map.is.

Refkelsvatn er yfirleitt gjöfulasta vatnið. Einnig er hægt að fá flotta fiska í Galtarvatni, Svínavatni og Þórarinsvatni. Oft er fiskar alveg neðst í læknum milli Svínavatns og Þórarinsvatns þar sem lækurinn rennur út í Svínavatn. Til viðbótar við þetta eru síðan helling af vötnum og sprænum á Haukagilsheiði.